Dunia: Hapa na Pale

Trump awabana Wakenya.

MKONO wa Rais wa Marekani, Donald Trump umewanasa raia 49 wa Kenya katika msako wa wahamiaji haramu na sasa ni miongoni mwa maelfu ya watu walio katika orodha mpya ya wanaosubiri taratibu za kufurushwa kutoka Marekani.

Majina na picha za Wakenya hao zimechapishwa hadharani ambapo Idara ya Usalama wa Taifa ya Marekani (DHS) imechapisha taarifa za raia 125 kutoka Afrika wanaosubiri kuondolewa nchini humo katika siku zijazo, huku Wakenya 49 wakiongoza orodha hiyo ikiwa idadi kubwa zaidi kutoka taifa moja.

DHS imepanua hifadhi data yake inayojulikana kama “wabaya zaidi,” inayolenga watu wasiokuwa raia wa Marekani walio na rekodi za uhalifu na wanaotafutwa kuzuiliwa na kufurushwa kutoka nchi hiyo.

KUMEKUWA na matukio ya kushangaza nchini Norway, kupitia hafla maalumu ya Jammertest ambayo huandaliwa kila mwaka na hufanyika hadharani, ikihusisha majaribio ya kuvuruga na kudukua mifumo ya mawasiliano.

Hafla hiyo iliyopewa jina la ‘vita isiyoonekana” hufanyika katika kisiwa cha mbali, takriban kilomita 300 kaskazini mwa Mstari wa Aktiki, kwa lengo rahisi, lakini la kushangaza, kutumia mawimbi ya setilaiti kubadilisha muda wenyewe na kujaribu iwapo vipokezi vya vifaa mbalimbali, kuanzia saa hadi droni, vinaweza kustahimili shinikizo hilo.

Washiriki huvaa makoti yanayoonekana kwa urahisi, ambayo huvaliwa kikazi, yakiwa na beji yenye picha ya sungura mweupe anayekimbia huku akiwa ameshikilia saa, kama yule anayejitokeza katika filamu ya Alice in Wonderland.

WAZIRI wa Mambo ya Nje wa Iran, Abbas Araqchi, amesema kwamba nchi yake, kupitia wapatanishi, imewasilisha mpango wa kufungua tena mlango wa bahari wa Hormuz Araqchi, ambaye mwishoni mwa wiki alikutana na kundi la waandishi wa habari pamoja na wanachama wa taasisi za utafiti na uchambuzi wa sera za Marekani, alisema iwapo Marekani itatimiza masharti maalum yaliyowekwa na Iran, mlango wa bahari wa Hormuz utafunguliwa tena ndani ya siku saba.

Amesema; “Masharti haya siyo mapya; ni yaleyale yaliyowasilishwa awali katika makubaliano ya Islamabad. Ni vyema makubaliano hayo yatekelezwe kabla ya uchaguzi wa katikati ya muhula wa Marekani.”.

Mambo bado ‘meusi’ Tigray HUDUMA za intaneti na mawasiliano ya simu zimekatizwa katika eneo la Tigray, kaskazini mwa Ethiopia, kufuatia kuzuka kwa mapigano kati ya vikosi vya Tigray na jeshi la serikali.

Huduma za kampuni ya mawasiliano ya serikali, Ethio Telecom, zimesimamishwa kabisa, huku huduma za kampuni binafsi ya Safaricom zikiendelea kupatikana katika baadhi ya maeneo.

Kundi la ufuatiliaji wa intaneti la NetBlocks limesema takwimu za mtandao zinaonyesha kuzimwa kwa huduma za intaneti katika sehemu za kaskazini mwa Tigray.

Mfanyakazi wa misaada kutoka Marekani anayefanya kazi Mekelle, Duke Burbridge, amekaririwa akisema huduma za mawasiliano zilikatika mwishoni mwa wiki jambo lililoongeza changamoto kwa wakazi wanaokabiliwa na hali ya taharuki kutokana na mapigano yanayoendelea.