Maridhiano Z'Bar ni suluhisho au mwanzo wa maswali mapya?

ACT Wazalendo walikuwa na hoja zilizowafanya kutokubaliana na matokeo yale na CCM nacho kilikuwa na hoja zake.

Siyo mara ya kwanza kuwepo kwa hali kama hiyo huko Zanzibar, lakini tukiangalia Tanzania kwa ujumla kumekuwa na hali ya kujivunia uwepo wa amani na utulivu hata wakati kunapokuwa na hali za kutokuelewana kwa vyama vikuu vya upinzani na serikali inayopo madarakani.

Ukiangalia sana inaonyesha ili tuwe na amani inayoitwa amani kunahitajika kuzungumza mambo ambayo huenda kuwa ni magumu lakini muhimu sana.

Makubaliano ya hivi karibuni yaliyofikiwa kati ya ACT Wazalendo na Serikali ya Mapinduzi Zanzibar, yameonyesha kuibua matumaini kwa baadhi ya watu, wakati kwa upande mwingine yamezua maswali mengi hasa wakijiuliza kwa nini kipindi hiki?

Tunapojaribu kutafakari hali hii tunaona kuwa kwa upande mmoja, ni jambo la kuangaliwa kwa matumaini pale unapoona wanasiasa waliokinzana wanafikia kuweza kukaa pamoja na kutafuta njia ya kuendeleza muafaka.

Historia ya Zanzibar, inatuonyesha jinsi ambavyo migogoro ya kisiasa ilivyoweza kuleta madhara makubwa kwa jamii.

Tukikumbuka jinsi kwa mara ya kwanza Tanzania ilizalisha wakimbizi, wananchi wa Zanzibar walipokimbilia shimoni, Kenya baada ya yaliyotokea baada ya uchaguzi wa mwaka 2000.

Kwa hali hiyo hatua yoyote inayoelekea kupunguza uhasama inastahili kujadiliwa kwa umakini tena kwa mtazamo chanya.

Lakini hapo hapo ndipo maswali yanapoweza kuibuka. Je, makubalianohayo yametoa majibu toshelevu ya sababu zilizofanya kuwepo na kutokuaminiana kisiasa? Au yanashughulikia zaidi matokeo yake?

Je, wananchi waliokuwa na malalamiko kuhusu mchakato mzima wa uchaguzi wamepata majibu ya kutosheleza? Tukifuatilia maridhiano hayo tunaweza kuona dalili za kuweza kujengwa upya imani ya wananchi katika taasisi za uchaguzi na hata taasisi nyingine za umma?

Swali jingine ambalo limekuwepo na ni la msingi sana ni iwapo ACT-Wazalendo, inaweza kushiriki katika serikali na hapo hapo iweze kutekeleza nafasi yake kama chama cha siasa kinachopaswa kuisimamia au kuiangalia serikali?

Wanaouliza swali hili siyo kwa nia ya kupinga ushirikiano bali ni swali linalohusu maana ya chama cha upinzani katika mfumo wa demokrasia ya vyama vingi.

Tunajua ipo mifano ya nchi ambazo huunda serikali za umoja kutokana na kura zilizopatikana lakini nyingi ya hizo huwa wameanza kwa kukubaliana na matokeo ya uchaguzi.

Swali jingine ni kuhusu upimwaji wa maridhiano hayo. Je kipimo ni idadi ya viongozi waliopata nafasi serikalini au kwa mabadiliko katika maisha na haki za wananchi? Sidhani maridhiano ya kweli ni kuhusu kugawana madaraka tu.

Maridhiano yatakuwa na maana yakihusisha kujenga mazingira ambayo wananchi wa kawaida wanaweza kuamini kuwa haki inalindwa, sauti zinasikilizwa na kura wanayopiga inakuwa na thamani. Makubaliano yasitazamwe kwa shangwe au kwa mashaka pekee bali liwepo jicho la wananchi wanaotaka kuona matokeo.

Huenda huu ni mwanzo mzuri ila mwendelezo wake lazima uambatane na uwazi, uwajibikaji, heshima ya haki za wananchi na hatua zinazojenga taasisi zenye kuaminika.

Ndiyo maana swali linalosimamia hoja ni iwapo mazungumzo hayo yatazaa nini kwa Zanzibar na hata kwa Tanzania kwa ujumla wake.

Huu ni ukurasa mpya au ni ukurasa wenye maswali mapya?

Mwandishi wa safu hii ya kila wiki, ni mwanaharakati wa demokrasia, haki za binadamu na mwanazuoni wa falsafa ya sheria.

Maridhiano Z’Bar ni suluhisho.