Burudani
Dudubaya alipiwa faini Basata
WAANDAJI wa Tamasha la Miaka 30 ya Bongo Fleva, wamelipa faini ya Shilingi milioni 3 iliyotolewa na Baraza la Sanaa la Taifa (Basata), baada ya kuwepo ukiukwaji wa maadili uliotokea katika tamasha la Septemba 19,2026 jijini Dar es Salaam.
Mratibu wa tamasha hilo, Hamad Ally maarufu Madee pamoja na msanii, Godfrey Tumaini maarufu Dudubaya walipigwa faini hiyo na Basata huku kila mmoja akitakiwa kulipa Shilingi milioni 3 ndani siku 14.
Kwa mujibu wa taarifa ya waandaji wa tamasha hilo iliyotolewa Septemba 26,2026, walipokea na kukubali kutekeleza uamuzi huo wa Basata kwa kulipa faini hizo.
“Baada ya kupokea uamuzi huo wa Baraza la Sanaa la Taifa (Basata), tunapenda kuujulisha umma kuwa tumepokea na kukubali kutekeleza adhabu zilizotolewa na baraza hilo na kwa haraka tumelipa faini,” imeeleza taarifa hiyo.
Taarifa hiyo ilieleza kuwa kukubali kufanya malipo hayo ni utayari wao wa kuzingatia sheria, kanuni na taratibu zinazosimamia sekta ya sanaa nchini.
Aidha kupitia taarifa hiyo waandaji hao wameahidi kuendelea kushirikiana na Basata pamoja na wadau wengine kuhakikisha shughuli zao zinafanyika kwa kuzingatia maadili.
Adhabu ya faini hiyo ilitokana na Dudubaya kubainika kukiuka Kanuni ya 20(a) ya Kanuni za Basata, Tangazo la Serikali Na. 137 la Mei 22, 2026, wakati akitumbuiza katika tamasha lililofanyika Septemba 19, 2026, Viwanja vya General Tyre, Arusha.
Kwa upande wa Madee, yeye alitozwa kulipa faini hiyo kwa kuendelea kumtumia Dudubaya jukwaani pamoja na kuwepo ukiukwaji huo.
Umebakiwa na makala 2 za bure mwezi huu. Jiunge ili kusoma bila kikomo.
- Dudubaya
- Basata
- Faini
- Muziki