Rukia maudhui makuu
Pambazuko
Ukweli Hauna Kutu

Habari

SELF Fund yaingia kwenye mikopo ya nishati safi ya kupikia

Taasisi hiyo ya umma inakaribia kushirikiana na Positive Cooker kuwezesha wananchi kupata majiko janja kwa mkopo, hatua inayolenga kupanua matumizi ya teknolojia za kupikia zinazotumia umeme kwa ufanisi.

Jumatano, 28 Oktoba 2026 · 11:26Dakika 4 kusoma
Mkurugenzi wa Kampuni ya Positive Cooker inayojihusisha na uuzajiw a majiko janja, Atukuzwe Nya, akieleza jinsi majiko hayo yanavyofanya akzi.
Mkurugenzi wa Kampuni ya Positive Cooker inayojihusisha na uuzajiw a majiko janja, Atukuzwe Nya, akieleza jinsi majiko hayo yanavyofanya akzi. — Green Waves Media

Na Mwandishi Wetu

SELF Microfinance Fund imeanza kupanua huduma zake za mikopo katika eneo la nishati safi ya kupikia, ikiwa ni sehemu ya jitihada za kuongeza upatikanaji wa teknolojia zinazolinda mazingira na kupunguza gharama za nishati majumbani.

Mkurugenzi Mtendaji wa taasisi hiyo, Santiel Manongi, alisema SELF inaelekeza nguvu katika bidhaa zinazolenga kulinda mazingira, ikiwemo majiko yanayotumia umeme kwa kiwango kidogo, huku ikiendelea kutoa mikopo kwa makundi mengine, yakiwemo watumishi wa umma.

Hatua hiyo inatarajiwa kuongezewa nguvu na ushirikiano unaoandaliwa kati ya SELF na kampuni ya Positive Cooker, inayosambaza majiko janja yanayotumia teknolojia ya kisasa ya kupikia kwa umeme.

Akizungumza na wahariri wa vyombo vya habari jijini Dar es Salaam katika mkutano ulioandaliwa na Ofisi ya Msajili wa Hazina, Manongi alisema taasisi hiyo ina bidhaa zinazolenga kusaidia wananchi kupata suluhisho za nishati zinazozingatia utunzaji wa mazingira.

Mkutano huo ulilenga kuipa nafasi SELF kueleza shughuli zake na maendeleo yaliyofikiwa katika kipindi cha miaka mitatu iliyopita, pamoja na kufahamisha umma kuhusu huduma zake kupitia wahariri wa vyombo vya habari.

Mikopo kufungua milango ya majiko janja

Mkurugenzi wa Positive Cooker, Atukuzwe Nkya, alisema kampuni yake inakaribia kuingia makubaliano na SELF ili kuwawezesha wananchi wanaokidhi masharti kupata majiko janja kwa mkopo na kulipa kwa awamu badala ya kulazimika kulipa gharama yote mara moja.

Alisema ushirikiano huo unaweza kupanua soko la teknolojia hiyo kwa wananchi ambao wamekuwa wakitamani kuitumia lakini wakikwamishwa na gharama ya awali ya kununua jiko.

“Usahirikiano wetu na SELF utafungua mlango mkubwa sana kwa watu wengi ambao walikuwa wanashindwa kupata na kutumia teknolojia kwa kutamani kulipa taratibu taratibu,” alisema Nkya.

Aliongeza kuwa walengwa wanaweza kujumuisha watumishi wa taasisi mbalimbali, vikundi vya kuweka na kukopa, pamoja na watu binafsi, kutegemea masharti yatakayokubaliwa na taasisi hizo.

Jiko linalolenga kupunguza matumizi ya umeme

Nkya alisema Positive Cooker inasambaza majiko janja yanayotumia teknolojia ya kisasa ya kupikia kwa umeme, akieleza kuwa moja ya changamoto kubwa katika kuhamasisha matumizi yake imekuwa hofu ya wananchi kuhusu gharama za umeme.

Kwa mujibu wake, jiko hilo limefanyiwa tathmini na kampuni inasema linatumia wastani wa uniti moja ya umeme kwa saa moja, gharama ambayo Nkya aliikadiria kuwa takribani Sh357.

Alilinganisha matumizi hayo na gharama za kununua mkaa kwa ajili ya kupika vyakula vinavyohitaji muda mrefu kuiva, kama maharage na makande, akisema teknolojia hiyo inaweza kusaidia baadhi ya kaya kupunguza gharama za kupikia.

Nkya alitoa mfano wa matumizi yake binafsi, akisema baada ya kuanza kutumia jiko hilo mwaka 2019 aliacha kutegemea gesi na mkaa kwa shughuli nyingi za kupikia. Alidai kuwa mabadiliko hayo yalimsaidia kuokoa takribani Sh20,000 kwa mwezi ikilinganishwa na matumizi yake ya awali.

Kwa hesabu yake, akiba hiyo inaweza kufikia Sh240,000 kwa mwaka. Hata hivyo, gharama halisi na akiba inayoweza kupatikana hutegemea matumizi ya kaya, bei za umeme na nishati inayotumika sasa, aina ya chakula kinachopikwa na muda wa kupika. Takwimu za kampuni zinahitaji kulinganishwa na matumizi halisi ya kaya tofauti ili kuthibitisha kiwango cha akiba kinachoweza kupatikana kwa ujumla.

Usalama na ufanisi wa kupikia

Akieleza sifa za teknolojia hiyo, Nkya alisema jiko lina mfumo wa kugundua sufuria na halijawashwa kwa ajili ya kupika bila chombo kinachotakiwa kuwepo juu yake.

Alisema teknolojia hiyo imeundwa kuelekeza joto kwenye sufuria na chakula kilichomo badala ya kupasha sehemu nyingine za jiko kwa kiwango sawa na baadhi ya teknolojia za kawaida. Kwa mujibu wake, jiko pia lina mifumo ya kuweka muda wa kupika, kuzimika kiotomatiki na kudhibiti baadhi ya shughuli za kupikia.

Alitaja mfano wa mfumo wa kudhibiti maziwa yanapochemka, akisema jiko linaweza kupunguza au kusitisha upashaji joto yanapokaribia kufoka, kisha kuendelea baada ya hali kutengamaa.

Sifa hizo, alisema, zinaweza kupunguza hitaji la mtu kusimama karibu na jiko muda wote, huku zikiimarisha urahisi na usalama wa matumizi ya nyumbani.

Nishati safi na changamoto ya gharama

Kuingia kwa SELF katika eneo hili kunakuja wakati gharama ya awali ya kupata teknolojia mpya ikiendelea kuwa kikwazo kwa baadhi ya kaya zinazotaka kubadili njia za kupikia.

Kwa kaya zinazotegemea kuni na mkaa, majiko yanayotumia umeme yanaweza kuwa njia mojawapo ya kupunguza utegemezi wa nishati hizo, ingawa manufaa ya kiuchumi hutegemea gharama ya kifaa, upatikanaji wa umeme wa uhakika na uwezo wa kaya kumudu matumizi yake.

Nafasi ya SELF katika uchumi jumuishi

Ushirikiano unaotarajiwa kati ya SELF na Positive Cooker unaweka taasisi hiyo ya umma katika nafasi ya kusaidia kupanua upatikanaji wa teknolojia za kupikia, huku ukifungua mjadala kuhusu namna mikopo midogo inavyoweza kutumika kufanikisha malengo ya kiuchumi na kimazingira.

Iwapo makubaliano yatakamilika na mikopo hiyo ikaanza kutolewa, jambo muhimu litakuwa kuhakikisha wananchi wanapata taarifa zilizo wazi kuhusu masharti, gharama na muda wa marejesho, pamoja na ushahidi unaoaminika kuhusu matumizi ya umeme na akiba inayoweza kupatikana.

Umebakiwa na makala 2 za bure mwezi huu. Jiunge ili kusoma bila kikomo.

Soma Pia