Siyo kampeni ya kusubiri wageni

Chalamila amesema dhamira kubwa siyo kufanya usafi kwa muda ili kujibu karipio la Rais Samia, bali kujenga utamaduni mpya utakaofanya usafi kuwa sehemu ya maisha ya kila siku ya wakazi wa Dar es Salaam.

“Kwa wazi kabisa tumekubaliana, kuanzia ngazi ya mkoa, halmashauri hadi kwa wananchi, kwamba tulijisahau. Tulijisahau kwa muda,” alisema Chalamila katika mkutano na wahariri na viongozi wa jiji Septemba 17.

Kauli hiyo ndiyo jibu la wazi zaidi la uongozi wa Dar es Salaam tangu Rais Samia alipotoa tathmini kali ya hali ya usafi wa jiji hilo Septemba 2, 2026, wakati akiwaapisha viongozi kadhaa Ikulu ya Tunguu, Zanzibar.

Rais alisema baadhi ya maeneo ya Dar es Salaam, hasa nje ya sehemu zinazoonekana zaidi katikati ya jiji, yalikuwa machafu na akawataka viongozi wa mikoa na halmashauri kusimamia usafi kikamilifu.

Pia alitaka mikataba ya ukusanyaji taka ipewe wakandarasi wenye vifaa na uwezo wa kufanya kazi hiyo.

Sasa Chalamila anasema ujumbe huo umefika.

“Ni jambo ambalo lazima tuwajibike, tubadilike na tujenge utamaduni mpya kuhusiana na usafi na utunzaji wa miji yetu,” alisema.

Siyo kampeni ya kusubiri wageni Moja ya mambo ambayo Chalamila hataki yarudiwe ni tabia ya kusafisha Dar es Salaam wakati tu jiji linapotarajia wageni mashuhuri au mikutano mikubwa ya kimataifa.

Akirejea uzoefu wa Dar es Salaam kuwa mwenyeji wa mkutano mkubwa wa Energy Summit, Chalamila alisema mamlaka ziliweza kubadilisha mwonekano wa jiji kwa kusimamia kwa karibu usafi na matumizi ya maeneo ya umma.

Katika kipindi hicho, alisema, baadhi ya shughuli zilizokuwa zinafanyika katika maeneo yasiyoruhusiwa ziliondolewa, matumizi ya barabara yakasimamiwa kwa karibu na wafanyabiashara waliokuwa wamevamia baadhi ya maeneo wakapangwa.

Hatua hizo zilifanya jiji lionekane tofauti, lakini tatizo, kwa mujibu wa Chalamila, lilikuja baada ya tukio hilo kumalizika.

“Baada ya mkutano kuisha, nadhani tukaanza kupunguza kasi,” alisema.

Chalamila ametolea mfano baadhi ya miji mikubwa ya China, akisema usafi katika miji yenye shughuli nyingi za biashara na utalii umejengeka kuwa sehemu ya utamaduni wa maisha ya mijini.

Wakandarasi wapewa muda Lakini mpango mpya hautaishia kwenye elimu na kampeni pekee, alisisitiza Chalamila, ambaye alitangaza hatua zinazolenga kubadili namna taka zinavyokusanywa na kushughulikiwa katika mkoa huo kitovu cha biashara nchini.

Aliwapa wakandarasi wa ukusanyaji taka miezi mitatu kuhakikisha wanakuwa na vifaa na teknolojia za kudhibiti taka inayokidhi mahitaji ya Dar es Salaam. Amesema mkoa unataka mfumo unaowezesha shughuli za usafi kufanyika hata wakati wa usiku, badala ya magari ya taka kuongeza msongamano au kuingiliana na shughuli nyingine za jiji wakati wa mchana.

Hatua hiyo inaonekana kujibu moja kwa moja hoja ya Rais Samia kuhusu uwezo wa wakandarasi wanaopewa kazi za usafi.

Rais alikuwa amehoji mantiki ya kazi hiyo kupewa watu wasiokuwa na vifaa na uwezo unaolingana na ukubwa wa tatizo la taka katika majiji makubwa.