Tanzania inapaswa kuzingatia mambo haya

Badala ya kulikabili kwa uwazi, tumekuwa tukituhumiana, kutafutana wachawi na kupotezana. Propaganda nayo imekuwa kisingizio cha kuchelewesha suluhu ya kudumu.

Kilio cha ukweli na maridhiano hakipewi nafasi inayostahili. Muda, nguvu na rasilimali zinazohitajika kusikiliza walioathirika na kutafuta njia ya pamoja zinatumika kujenga tuhuma na kueneza propaganda.

Hatuwezi kutarajia amani ya kweli ikiwa tunakataa kujua kilichotokea, kuwajibisha waliokosea na kuwapa waathirika nafasi ya kusikilizwa.

Bila maridhiano ya kweli hatutafika mbali.

Taifa letu linaweza kugeuka kitalu cha kustawisha visasi, ambapo kila kizazi kinarithi uchungu wa kilichotendwa kwa kilichotangulia. Tusipolipwa na tunaowatesa, tutalipwa na Mungu.

Maandiko katika Isaya 34:8 na Warumi 12:19 yanatukumbusha uzito wa kisasi na hukumu.

Hata kwa wasioitazama hoja hii kwa jicho la imani, ujumbe wake ni wazi: dhuluma haijengi msingi wa taifa lenye utulivu.

Godbless Lema, John Heche na wanaharakati wengine si kiini cha tatizo letu kama taifa.

Kuelekeza nguvu katika udhaifu unaodaiwa wa watu binafsi kunatutoa kwenye swali muhimu zaidi; tunajenga nchi ya aina gani?

Kutumia hila au vitendo vya jinai kuwadhibiti wakosoaji hakuondoi sababu zinazowafanya wananchi walalamike. Kunazidisha hofu, kunapunguza uaminifu na kunafunga mlango wa mazungumzo.

Taifa huunganishwa na maono ya pamoja, haki na heshima kwa utu; haliunganishwi kwa damu wala hila.

Tanzania ni kubwa kuliko mtu yeyote na chama chochote. Tunahitaji viongozi na wananchi wenye ujasiri wa kusema ukweli, kusikilizana na kukubali kurekebisha makosa.

Bila maono ya kitaifa, hata wale tunaowatumia kuwadhibiti wakosoaji watakosa mwelekeo. Njia ya kutoka siyo kumtafuta mchawi mwingine, bali ni kukabili tatizo lenyewe na kuanza maridhiano ya dhati.

Mwandishi wa safu hii ni Askofu wa Kanisa la Kiinjili la Kilutheri Tanzania (KKKT), Dayosisi ya Karagwe. Ni mchangiaji maalum wa safu na makala ndani ya Pambazuko.

Waliowahi kuwa marais wa Tanzania; Ali Hassan Mwinyi, Benjamin Mkapa, Jakaya Kikwete na John Magufuli. (Picha kutoka Maktaba ya Pambazuko).